ევროპის ჩემპიონატი 2022

5-15 ნოემბერს, თურქეთის ქალაქ ანტალიაში, ჩატარდა ევროპის ჩემპიონატი 8-დან 18 წლამდე გოგონებსა და ვაჟებს შორის.

საქართველოს ნაკრების მთავარი მწვრთნელი გახლდათ საერთაშორისო დიდოსტატი დავით ჯოჯუა.

ტურნირში ბოლო ტურის წინ რამდენიმე მედლის მოპოვების შანსი არსებობდა, მათ შორის ოქროს მედლის აღება შეეძლო 12 წლამდე გოგონებში კესარია მგელაძეს(მწვრთნელი ნიკოლოზ მანაგაძე), რომელმაც სამწუხაროდ მოგებული პარტიის მიყვანა ვერ შესძლო ბოლომდე. ასევე აღსანიშნავია, რომ კესარია მსოფლიო ჩემპიონატზეც ლიდერებში იყო და იქაც ბოლო ტურებში განიცადა მარცხი. თუმცა ამავდროულად სასიამოვნოა რომ კესარია სტაბილურ შედეგებს აჩვენებს თავის ასაკში მსოფლიოს მასშტაბით და დარწმუნებული ვართ, რომ ეს უიღბლო ფინიშები უახლოეს მომავალში დიდი წარმატებებით შეიცვლება.

ამავე ასაკში, ბრინჯაოს მედალი ფაქტიურად ერთ სვლაში ხელიდან გაუშვა მარიამ კალანდაძემ(მწვრთნელი თენგო დიდმანიძე).

14 წლამდე გოგონებში ბოლო ტურში ერთმანეთს დაუპირისპირდა ორი ქართველი მოჭადრაკე მარიამ ცეცხლაძე (მწვრთნელი დავით მაღალაშვილი) და ანასტასია კირთაძე (მწვრთნელი გიგა ყუფარაძე), მოგების შემთხვევაში ანასტასია ხდებოდა ჩემპიონი, მაგრამ საბოლოოდ უშეღავათო ბრძოლაში მარიამმა გაიმარჯვა, გაიყო მეორე-მეოთხე ადგილი და მხოლოდ კოეფიციენტი დააკლდა მედლის მოპოვებისთვის.

18 წლამდე გოგონებში, ბოლო ტურის მოგების შემთხვევაში ვერცხლის მედალს ეუფლებოდა ნია დონღვანი (მწვრთნელი დავით ჯოჯუა), მაგრამ ნიამ ვერ გაუძლო ბოლო ტურის დაძაბულობას, ვერ გამოიყენა მეტოქის მიერ მიცემული შანსები და სამწუხაროდ, საბოლოოდ დამარცხდა, შესაბამისად იგი მხოლოდ მეცხრე ადგილს დასჯერდა.

14 წლამდე ბიჭებში კარგად იასპარეზა დავით ნემსაძემ(მწვრთნელი გიგა ყუფარაძე), რომელიც ბოლო ტურის მოგების შემთხვევაში მესამე ადგილს გაიყოფდა და ყველაფერი კოეფიციენტზე იქნებოდა დამოკიდებული. დავითი საბოლოოდ ყაიმს დასჯერდა და დაიკავა მეშვიდე ადგილი.

ერთადერთი მედალი საქართველოს 10 წლამდე ვაჟებში შესანიშნავად მოასპარეზე გაბრიელ გაბადაძემ მოუტანა(მწვრთნელი გიორგი ტყეშელაშვილი), რომელმაც დაუმარცხებლად განვლო მთელი ტურნირი (5 მოგება, 4 ყაიმი) და დაეუფლა ვერცხლის მედალს. ვულოცავთ გაბრიელს ბრწყინვალე ასპარეზობას.